Ayeedek Pɔl ween toonyai o Yeso waragɛ nico ɔl o tuwento kutuure o adikir kazi Rom, eeci arɔɔŋ niini koobek nɔɔgɔ kaaviyak o gɔɔn uuwak niini vitɛnane ogɛɛn. Oobek ni niini nɔɔgɔ gi ci anek nɛ, kaviyawa o Yeso abon ayelza banat o anyaani Tammu ɔl loocowɛ dook kivitaak nɔnɔ ŋaati atuwi niigi Yeso giye o iiya utugu niini. Ayelek zɔɔz nici ɔl o Juuz atu Yeso gi o buk abilni zɔɔz nici tɔ Terkedinte o rɛɛn, maje olee o alaŋ een Juuz ayelzak zɔɔz nici nɔɔgɔ gi o buk izitɔi niigi boor codoi olee o Tammo. Ma anek Pɔl nɔɔgɔ nɛ, inoko bar ageet aanyet Tammu kobonta ŋuume onin odota, alaŋ zin bodo karɔɔŋ gɔɔl ci ka katalɔi niini ŋatinai goole ci kazooni lootinok dɔɔyize cinai doon. Bar ma kaanyek Vɔɔŋiz o Tammo karawoyet niini ageet baayize onai, kabaak koco baayiz o arɔɔŋ Tammu ŋaatinai.
Ma waragewe nico vuruta (Zooc 12-15) iloot Pɔl ɔrɔɔt ɔl o tuwento kabaayito baayiz o ɔl o Tammo. Ma arican gi ci abon arɛɛzi niigi ɔl oogi kuruum buk ɔl o alaŋ adoye zɔɔz cineeŋ kibeen ageet, ma amarninet ageet, ma abon buk katiitiny naaga ɔl o loocu abalet. Atornɛkɛ Pɔl waragewe nico (Zooc 16) zaawinte ci azaawi laŋotigin kutuure ci kazi Rom noko ŋaati ayɛɛdi nɔɔgɔ zaar.
