Matiyo waanice eet codoi toonnyawe o Yeso een amɔnki ram. Gi codoi kaale o amɔr nɔɔnɔ kɛtɛyɛɛd wɛrɛgɛ nico nɛɛn gi ci ka kɛyɛlɛkɛ Juz gi o ɛɛnɛ Yeso Ruguzoi (Masaya) baal aterkedek Tammu nɔɔgɔ ka kitoonak e. Gi ci zin akanaan Matiyo wɛrɛgɛ cin o giye ci azɛɛdi jijitigi Yeso, ma ayelza wɛrɛgewe cin o gi ci aanyekɛ Yeso zoozok baal meelik aduwa nyakaŋanɛta Terkedinte o Rɛɛn e kɛlɛɛmtɛ.
Bar aanyet Matiyo buk demziin o Yeso o anɛ nɛ baliin o Tammo akati ɔl dook o agɔɔn kaal o arooŋek Tammu nɔɔgɔ kutuguzɔ. Zoone ceen 5 zɛɛ been 7 kajowa zɔɔz ci aduwakɛ Yeso ɔl gɔɔl ci atobɔnɛ baliin o Tammo ki naagin, zooce ceen 10 e aduwa zɔɔz ci ka kaparɔi baliin o Tammo loota ŋina, ma zooce ceen 13 e aduwa Yabzinok ci akati baliin o Tammo, zooce ceen 18 e aduwa gɔɔl ka kabaakti baliinte o Tammo ku, ma zoone ceen 24 zɛɛ been 25 ayelza gɔɔl ka kiiyakɛ baliin o Tammo looc tiŋeere. Onyoogɛ ni wɛrɛgɛwi zooze o adikir aricanek Yeso nuyak ogin ka kɔɔt kaanycekɛ ɔl modene dook kiziti nuyak cigin.
Aduwa wɛrɛgɛ nici bɔyɛn ci baayiz baal Yeso loota ŋina kanaanta zɛɛ been ṯir. Akana tiryante onin ki toonyɛnɛt onin kibeen cinnyan baal acinan loryen e. Ma buk aduwa liŋliŋɔn onin baal uuwayi ki demziin onin ki kaal baal arogzi ɔl o amɔɔr Galiliya e. Ɛtɛyɛɛd ni keroni baal Yeso Galiliya akɔyi Jerusalɛma e ki kaal baal agooni iinyaye ween torgɛrɛm baal aṯornɛkɛ rogɛti oninɛ loota e, ma aṯornɛkɛ doodinɛt oninɛ keete ween talakec ki ŋaazi onin baal Iŋaani daayiza e.
