Ayɛɛd wɛrɛgɛ nico Marko baal buk kazi zaar oogi nɛ Jɔn Marko e. Waanice niini logo ci miliny Jerusalɛma waan baal aavɛ Yeso Jerusalɛma e, ma iiya izi nuyai ci Yeso. Ma vuruta iiya oorkorit ki Pɔl ween toonnyai ma vurute nice ook itirit Pitɔr liŋliŋɔnta. Ma zoozowe ci akati Yeso ayɛɛla niini zoozok ki kɛɛranɛ ci ɔl o Juz meelik, ayɛɛd niini kaal nicoko ka kitirit ɔl o alaŋ eegin Juz ma ivita iziti Kiristan.
Aduwa Marko wɛrɛgewe nico kaal baal agɔɔn Yeso e kujuk kaal baal aduwa Yeso e. Kajowa agɔɔn Yeso vulyak ci atɛɛd ɔl biye meel gɛr, arogoz ɔl ci meel morizowɛ, ma ɔɔga ɔl ci meel anyak miniŋ eleetinɛ kɔtɔɔzɔ labak ma buk ooŋnek ɔl bacinok ugeec. Ayelza liŋliŋonowa nici alaazɛt o Yeso o akuni ka kiiya kiirik ɛlɛ onin ka kɔɔga ɔl dɔɔyize o oŋecu.
Aduwa Marko baayiz ki liŋliŋɔn o Yeso akana waan baal oonyi Jɔn nɔɔnɔ e. Ma azɛɛda keeŋti baal iinya o aṯornɛkɛ iŋaan Yeso kɔtɔdɔwɛ e zɛɛ ma anyoog zoozowe akati ŋaazi o Yeso daayiza been koyi o akɔyi Tamma.
