Akana waanice laadun tuwɛn Tɛsolonika Pɔl (Toonnyak 17). Ma Tɛsolonika kutuur ci adikir gonogin looce o kazi Masedoniya ci abil looc o kazi Giriiz libire ci baatikeeri e. Ma taman nɔkɔ, itiŋa Pɔl ɔtɔ ŋinaante, eeci anyak ɔl oogi olee o Juuz ci arɔɔŋ kuruyit nɔɔnɔ. Ma vuruta, iiya Timozi o gɔɔn atirit nɔɔnɔ, ma aku oobek nɔɔnɔ zɔɔz ci ɔl o tuwento looce o kazi Tɛsolonika, yonuun agid ɔl nɔɔgɔ o, amɛna niigi atu Tammu nɔkɔ labak. Ayɛɛd zin Pɔl waragɛ nico o, arɔɔŋ kideziyek nɔɔgɔ, ma buk acaacak nɔɔgɔ zoozok ugeec ajin.
Ma waragewe nico, atal Pɔl Tammu towɛɛnta ki rezonte ci ɔl o Tɛsolonika, ma aadak buk nɔɔgɔ gi baal abayi niini ŋaatineŋ kizi eet o tuwento e. Oobek ni bodo Pɔl nɔɔgɔ gi ci mã adai ɛɛti ci atuwe, agoononek ni vurute ci daayizo, kibeen gi ci tiŋeere mã abada Yesu, agooni ni. Ma eeci atornɛkɛ o, obek nɔɔgɔ gi ci abon abaayi niigi juruuŋ nɔkɔ zɛɛ ma aku iiteni nica.
